Bèste Sjansemaekers en Sjansemaekerinnekes,
’t Assekruutske is gehaoldj, de hiëringe zeen gesjèldj en daomèt is de vastelaovendj den echt väörbie. Waat waas ’t ‘n fantastisch seizoen! D’r is zoeaväöl gebäördj det ich nog neet alles höb kinne laote bezinke mer de aafgeloupe paar daag zeen d’r al get sjoean momente door miene kop gegange.
’t Sjansespass zoot weer vol stimmung en waas ein groeat fiëst. ‘n Geweldjig SLK mèt väöl Roggelse meziek woea ich verrastj waerdje mèt ’n kneiter van ‘n plaat door de Ruuzeliërs. De Boorebroelof woea weer volop gedanstj waerdje waas ouch ‘nne te gekke aovendj. Zoea zeen d’r nog tich momente woea ich waarsjienlijk äöver ‘nne tied waal ‘n book äöver kan sjrieve.
Die fiëste woea wae hae kènne gaon waere natuerlijk georganiseerdj door commissies en vereniginge. Daobie waere die gedreijdj door de talloze vriewilligers die Roggel riek is. Det is echt get waat allein in Roggel kèn en ich wil den ouch ederein bedanke dae haet biegedrage aan geveerdje fiëste.
De vereniging waat det allemaol mäögelijk maaktj is de Sjansemaekers mèt ’n bestuur det steit wie ’n hoes. Waat höbtj gae ’t good väör elkaar! Ouch uch wil ich ontzettend väöl bedanke väör alles waat gae väör de Roggelse vastelaovendj dootj.
Mien Prinsehoes waas dit jaor oppe Laak bie Hans en Marleen. Bie Sjrake kóste wae altied terecht en waerdje wae good verzörgdj. Ich wil Hans en Marleen den ouch hertelijk bedanke väör alles waat gae gedaon höbtj. Merci väör alles!
Die knappe jong men van de raod van 11 zörgdje äöveral väör spass en plezeer. Waat höbbe wae väöl gelache en waat höbbe wae väöl mètgemaaktj same. Aöveral woea wae zeen gewaesj mooktj gae d’r ein groeat fiëst van. Jongens, ontiegelijk bedanktj!
Rens en Bart wore mien adjudante en waat höbtj gae d’r väöl väör gedaon. Ich höb al dök mótte dinke aan alles waat gae georganiseerdj höbtj en wie good det det allemaol ging. Alle ritjes nao ’t Nieke en weer nao ’t dörp, regele van materiale, aete drinke en ich kèn nog waal ff doorgaon. Jonges echt waanzinnig bedanktj väör alles.
As lètste wil ich gaer mien femilie bedanke en in ’t speciaal Lieke en Duuk. ‘nne Druim kwoom oet, gae woortj d’r äöveral bie óm van dae druim herinneringe te make. Mien Prinsepak geit straks ‘nne kiër definitief oet mer det klein pekske zal väör altied bie ós blieve. Hiël erg bedanktj.
Dit waas echt get óm noeats miër te vergaete. Dit haaj noeats gekosj zónger uch Roggelse miense. Leef Sjansemaekers en Sjansemaekerinnekes,
Dit höbbe wae gedaon, dit haoje wae aan!
Prins Tom I