‘t Óntstaon vanne Sjansemaekers
In de nao aorlogse jaore, örges begin jaore 50 waerdje d’r al get vastelaovesactiviteite georganiseerdj door de fanfaar, mer d’r waas toen nog geine Prins.
De kiem vanne Sjansemaekers is gelagdj in ’t begin van 1953, bie Drees (Metsemakers) oppe kirkstraot. Dao kwaam ’n clubke jóng men bie ein, die probeerdje óm ‘nne vastelaovesprins mèt raod van elf oppe bein te kriege.
Oeteindelijk zeen alle vastelaovesactiviteite in 1953 neet door gegaon vanwaege dae versjrikkelijke watersnoeadramp in Ziëlandj.
In 1954 kwaam detzelfdje clubke vastelaovesveerders weer bie ein en beslaote ze det ze ’t weer opnoe ginge probere. Via ‘nne oproop in ’t Roggels Blaedje waerdje de Roggelse miense gevraogdj óm de vastelaovendj in Roggel inne steigers te zitte. En dae oproop kraeg ‘n good gevolg. En die men ginge aanne slaag.
Dao waerdje ‘nne Prins gekaoze. Óm de Prinsekeuze zoea good mäögelijk geheim te haoje, waerdje dit gedaon inne kefee van Tjeu van Sjaeres op Sint Elisabeth, op ‘nne woonsdig aovend as de kefee eigelijk geslaote waas.
De Bóntje aovendj waerdje in 1954 gehaoje bie zaal Sjaeres oppe Mäölewaeg. ‘nne Aovendj mèt muziek, zang en besjaafdje humor. Daezelfdje aovendj waerdje d’r ‘n Sjansemaekersverhaol vertèldj. In det verhaol waerdje vertèldj det ‘nne Sjans ‘nne bössel hout is bie ein gebónje mèt ‘n wits. Dees waerdje vreuger gebroektj óm de kachel, ’t fornuus, de verkeskaetel of ’t backus te staoke. De Sjans waas toen ‘n energiebron.
Begin 1800 kwoom ouch Roggel ónger Frans bewindj en móste de jóng men óngerduke in de bosse óm de Franse deenstplicht te óntvluchte. Óm de tied te verdrieve, ginge ze Sjanse make. En zoea óntstóng de naam Sjansemaekers.
Dit verhaol haet destieds de pioniers van ós vereniging geïnspireerdj óm ós vasteloavesvereniging de naam Sjansemaekers te gaeve.
Inmiddels zeen wae bienao 77 jaor verder en is CV de Sjansemaekers deep geworteldj in de Roggelse samelaeving. Wae zeen ‘n groeate en gruetse vereniging mèt prachtige tradities